開BLOG篇 - 傳統客家蘿蔔茶果

作為開BLOG第一篇，當然要教大家整一樣傳統的客家美食啦!

呢樣就係客家蘿蔔茶果!

蘿蔔茶果製作過程比較煩複，但只要一步步跟住做就會成功嫁喇。

介紹下材料先:

以下材料分量大約做到35-40隻手心大小的茶粿，
第一次試做可按返比例將材料減半。

餡料:
1. 白蘿白 (約十斤)
2. 蝦米 (隨意)
3. 攪碎豬肉 (約$40)
4. 芹菜 (少許)
皮料:
1. 燸米粉 (2包)
2. 粘米粉 (半包)
3. 熱滾水
墊底:
可用菜葉/蕉葉都可以，剪成圓型。

我地要先預備餡料:

1. 蘿蔔洗乾淨，然後刨粗絲; 肉碎落少少油同鹽醃一陣。

2. 燒熱鑊落少許油，爆香蝦米，然後落豬肉碎炒熟，再加D芹菜炒下，
見豬肉炒熟了就可以上碟備用。

3. 然後燒熱鑊落D油，將蘿白放落去慢慢炒，一路炒會出水，由得佢唔洗
理，炒到佢剛剛熟(開始淋)就好撈起，放去筲箕瀝乾D水份，可以用手
揸一揸乾D水份，總之要比較乾身。

4. 然後將炒好的蘿白，加落去D豬肉餡入面，撈均曬佢。

5. 呢個時候，落鹽同胡椒粉調味，撈均之後記得試味。

6. 餡料就完成了，放埋一邊備用。(睇下，係冇咩水份的)

跟住就可以搓粉:

1. 首先將2包燸米粉同半包粘米粉倒係個大盆入面，
跟住我會撈一撈勻佢。

2. 小心準備熱滾水，係滾水唔係熱水，因為要"辣"熟D粉。

3. 係D粉中間開個窿，先倒入半杯滾水左右，因為係滾水，
記得咪一野用手搓落去，唔係變豬手嫁喇。

我會用大木匙幫手，將水同旁邊的粉慢慢混合，由內至外慢慢做。

4. 呢個時候，係明顯會好唔夠水，就重覆上面的步驟。

5. 水要分開咁落，直到你成功攪到佢開始變成一個粉團。

6. 唔夠水D粉就會一塊一塊，難以成團，盡量情願水太少，慢慢加。

7. 其實最好係落手搓，但太熱我都頂唔順，所以我都係用木匙幫手
撈到咁上下，先落手搓舊粉。

8. 要一路反覆用力搓，我會將粉團外部向內搓，然後轉一轉方向，
又將粉團外部向內搓，盡量將粉團搓倒內外都差唔多程度，
即係唔好一忽太乾一忽又太濕。

9. 點知舊粉團已經OK呢? 最簡單就係你試下係舊粉團摵一忽出黎，
係掌心壓匾，FEEL下佢會唔會太濕OR太乾，因為係用黎包餡，
所以如果一PAT痴住手板即係濕得濟，相反如果你一壓匾佢就
龜裂唔夠彈性就太乾了。呢方面好難言諭，大家試下就會明，唔難的。

然後就開始包餡:

1. 呢款茶粿好家常的，你鍾意包大隻d又得，細隻D都得，做法一樣的。

2. 首先，準備少少生燸米粉，撲少少係手度。

3. 摵一舊仔粉團，放係手心壓匾，用另一隻手腕慢慢輕壓，
令佢成為一塊簿皮(1-2mm左右啦)，第一次可以厚DD，熟手之後
就可以再壓簿少少。

4. 係塊皮的中間，放上餡料。5. 塊皮係有一定的彈性，包的時候，係一摺一摺咁向內包(唔知你地明唔 
明)，即係類似小籠包個頂咁呢...

6. 每一摺都用手指盡量壓簿塊皮。

7. 摺到尾應該會有一舊粉突左出黎，呢舊粉記得摵走佢，否則就會
會成舊粉團影響口感。8. 其實包的方法都唔緊要的，總之唔好穿唔好漏就得，因為包好之後，
我地就將塊菜葉放係上面，然後反轉個茶粿，呢個先係見人嗰面。

9. 包好曬之後，就可以拎去蒸，大約10-15分鐘就大功告成喇。

蒸好之後要趁熱食呀!

廚房佬小貼士:
1. 如果大家想包得方便D，可以用一個好細圓圓地嗰種小蘋果黎碌塊皮，
代替用手脆黎壓塊皮，會比較均勻同容易控制。
包的途中如果覺得少少痴手，就撲少少粉落隻手/蘋果度。

3. 有d人喜歡食比較煙un的皮，搓粉時可以成團之後再努力搓耐d，
同埋可以「撻生魚」咁搓下又撻下。 

4. 因為用滾水開粉，真係要小心，不能太心急，唔小心好易辣親嫁，
雖然摸落唔太熱，就諗住落手搓，點知一搓舊粉包住d未吸收曬的滾 
水...

5. 餡料係我屋企的傳統口味，蝦味同芹菜多d就會惹味d。
豬肉肥瘦大家都可以自己選擇，有少少肥就比較香d，我就鍾意全瘦。
出面有時會有眉豆茶粿賣，其實做法差不多，只是餡料不同。

6. 墊底可用菜葉或者蕉葉，蕉葉比較難買但比較挺身，美觀d有少少清香。
菜葉就方便d，唐生菜/大菜心都可以，蒸熟後可以連塊葉食埋，
乾手淨腳~ 我今次係用菜花，餘底d莖拎黎煮油菜/切粒粒炒飯都唔錯嫁。